काठमाडौं - आज कुशे औँसी अर्थात् बाबुको मुख हेर्ने दिन, दिवङ्गत पिताको सम्झनामा तर्पण, सिदादान र पिण्डदान गर्न काठमाडौँको गोकर्णेश्वर उत्तरगया पितृ तीर्थमा बिहानैदेखि हजारौँ भक्तजनको भीड लागेको छ।

भाद्रकृष्ण औँसीका दिन गोकर्णेश्वरमा श्राद्ध गर्दा २१ पुस्तासम्मका पितृले मोक्ष पाउँछन् भन्ने धार्मिक विश्वास छ। सत्ययुगमा स्वयं ब्रह्माले स्थापना गरेको यो तीर्थमा पिण्डदान गर्दा अगतिमा परेका पितृसमेत तर्छन् भन्ने मान्यताका कारण यहाँ हिन्दु तथा बौद्ध धर्मावलम्बीको घुइँचो लाग्ने गर्दछ।

बौद्ध धर्मावलम्बीहरू पनि आफ्ना दिवङ्गत पिताको स्वरूप दर्शन गर्न पाइने विश्वासका साथ पूजाआजा र श्राद्ध गर्न यहाँ भेला भएका छन्।

व्यवस्थापनमा कमजोरी, भक्तजनलाई सास्ती
धार्मिक रूपमा यति ठूलो महत्त्व बोकेको तीर्थस्थलमा व्यवस्थापन भने फितलो देखिएको छ। भीडका कारण जोरपाटी-सुन्दरीजल र वाग्मती कोरिडोरमा सवारीसाधन आवतजावतमा रोक लगाइएको छ, जसले गर्दा भक्तजनहरू लामो दूरी हिँड्न बाध्य भएका छन्।

डोल्पाबाट आएका एक तीर्थयात्री रणेन्द्र बुढाथोकीले मन्दिर क्षेत्रको साँघुरो बाटो र सवारीको असुविधाले दुःख पाएको गुनासो गरे। सार्वजनिक जग्गा मिचेर घर बनाइँदा बाटो साँघुरो भएको र सरकारका तीनै तहले पवित्र स्थलको व्यवस्थापनमा ध्यान नदिएको भन्दै धेरैले आक्रोश व्यक्त गरेका छन्। मेला समितिले यातायात व्यवस्थापन, स्वास्थ्य सेवा र स्वयंसेवक परिचालन गरे पनि भक्तजनले भने सास्ती भोग्नुपरेको गुनासो गरेका छन्।

कुशे औँसी र बाबुको मुख हेर्ने पर्व
आजको दिनलाई गोकर्णे औँसी पनि भनिन्छ। दिवङ्गत पितालाई सम्झिनुका साथै जीवित पितालाई सम्मान प्रकट गरी मिठो-मसिनो खुवाएर 'बाबुको मुख हेर्ने' पर्व पनि देशभर मनाइँदैछ। साथै, वर्षभरि गरिने धार्मिक कार्यका लागि हिन्दु धर्मावलम्बीले आजकै दिन घरमा कुश भित्र्याउने चलन छ, जसलाई 'कुशे औँसी' भनिन्छ। कुशलाई भगवान् विष्णुको प्रतीक मानिन्छ।