२०८१ मङ्सिर २८, शुक्रबार
२०८१ मङ्सिर २८, शुक्रबार
काठमाडौँ- सरकारले ५ जना प्रहरी अतिरिक्त महानिरीक्षक (एआईजी) को सरुवा गरेको छ । शुक्रबार बसेको मन्त्रिपरिषद् बैठकले विभिन्न कार्यालयमा कार्यरत एआईजीहरूको सरुवा गरेको हो । पदस्थापन भएको ५ महिना नपुग्दै सरकारले उनीहरूको सरूवा गरेको हो। सरकारले उनीहरूको गत चैत १४ गते पदस्थापन गरेको थियो।
काठमाडौँ उपत्यका प्रहरी कार्यालयका प्रमुख एआईजी श्याम ज्ञवालीलाई प्रहरी प्रधान कार्यालय कार्यविभागमा सरुवा गरिएको छ भने प्रशासन विभागका एआईजी दीपक थापालाई उपत्यका प्रहरी कार्यालयमा सरुवा गरिएको छ ।
यसैगरी, राष्ट्रिय प्रहरी प्रशिक्षण प्रतिष्ठानका एआईजी टेकप्रसाद राईलाई मानवस्रोत विभाग, मानवस्रोत विभागका एआईजी सन्दीप भण्डारीलाई राष्ट्रिय प्रहरी प्रशिक्षण प्रतिष्ठान र कार्यविभागकी एआईजी मीरा चौधरीलाई प्रशासन विभागमा लगिएको छ ।
केन्द्रीय अनुसन्धान ब्युरो प्रमुख किरण बज्राचार्य, प्रदेश समन्वय विभागका सुदीप गिरी र अपराध अनुसन्धान विभागका टेकबहादुर तामाङलाई भने यथावत राखिएको छ ।
प्रहरी नियमावलीअनुसार प्रहरी अधिकारीको सरुवा कम्तीमा एक वर्षमा गरिन्छ ।
काठमाडौँ उपत्यका प्रहरी कार्यालयका एआईजी श्याम ज्ञवाली नक्कली भुटानी शरणार्थी प्रकरणको अनुसन्धान अघि बढाएका थिए। काठमाडौं उपत्यका अपराध अनुसन्धान कार्यालय र जिल्ला प्रहरी परिसर काठमाडौंसँग समन्वय गरी अनुसन्धान अघि बढाइएको थियो।
उपत्यका प्रहरी कार्यालय प्रमुख ज्ञवाली, काठमाडौं प्रहरी प्रमुख एसएसपी दानबहादुर कार्की र काठमाडौं उपत्यका अपराध अनुसन्धान कार्यालयका एसएसपी मनोज केसी भुटानी शरणार्थी प्रकरणको समग्र अनुसन्धान प्रक्रियामा सामेल प्रहरी अधिकारी हुन् ।
पछिल्लो समय उपत्यका अपराध अनुसन्धान कार्यालयमा यसै सम्बन्धमा थप १८ जनाको जाहेरी परेको थियो।
उनीहरूकै टिमले गरेको अनुसन्धानमा पूर्वगृहमन्त्रीसमेत रहेका कांग्रेस नेता बालकृष्ण खाण, पूर्वउपप्रधानमन्त्री तथा एमाले सचिव टोपबहादुर रायमाझीसहितका उच्च पदस्थ अधिकारी तानिएका थिए । उनीहरू हाल पुर्पक्षका लागि कारागारमा रहेका छन् ।
