काठमाडौँ। करिब चार महिना भैरहवा कारागारमा बिताएका राष्ट्रिय स्वतन्त्र पार्टी (रास्वपा) का अध्यक्ष रवि लामिछानेलाई काठमाडौँको नख्खु कारागारमा स्थानान्तरण गरिएको छ। कृष्ण जन्माष्टमीकै दिन भएको यो स्थानान्तरणका क्रममा उनले पार्टीका शीर्ष नेताहरूसँग विमानस्थलमा भएको संक्षिप्त भेटमा आफू राजनीतिक प्रतिशोधबाट विचलित नभएको र जनताको अदालतप्रति पूर्ण विश्वस्त रहेको सन्देश दिएका छन्।

रास्वपाका सांसद मनिष झाका अनुसार, पार्टीको प्रदेशस्तरीय प्रशिक्षणका लागि भैरहवामा रहेका बेला अध्यक्ष लामिछानेलाई काठमाडौँ सारिन लागेको खबर पाएपछि उनी र पार्टी उपसभापति डा. स्वर्णिम वाग्ले भेटका लागि कारागार पुगेका थिए। तर, प्रशासनले अनुमति नदिएपछि उनीहरूले भैरहवा विमानस्थलमा भेट्ने प्रयास गरेका थिए।

लामो अनुरोधपछि विमानस्थलको प्रतीक्षालयमा प्रहरीको निगरानीमा जम्मा दुई मिनेटको भेट सम्भव भएको थियो। सांसद झाका अनुसार, १२६ दिनको कारागार बसाइपछि पनि लामिछानेको अनुहारमा कुनै थकान वा चिन्ताको भाव थिएन, बरु उनी दृढ र आत्मविश्वासी देखिन्थे।

सोही संक्षिप्त संवादमा लामिछानेले आफू बसेको भैरहवा कारागारको कोठाको भित्तामा एउटा गहिरो दार्शनिक सन्देश छोडेर आएको खुलासा गरे। उनले भने, "मैले कोठाको भित्तामा लेखेर आएको छु— अब यहाँ कृष्णहरू जन्मिने छैनन्। तर जन्मेकाहरूले नै कृष्ण झैँ बन्नुपर्नेछ।"

आफूमाथि भइरहेको कारबाहीलाई राजनीतिक प्रतिशोधको संज्ञा दिँदै उनले भने, "यिनीहरूले प्रतिशोध साध्न मंगलग्रह लगे पनि म डराउँदिनँ, यो मेरै देश हो। ४६३ दिनअघि कसैले प्रमाण छ भन्यो, मैले प्रमाण माग्दा उसले बल देखायो। न्यायको खोजी गर्दा उसको संयन्त्रले प्रतिशोध साध्यो।"

उनले आफूलाई भैरहवामा माया, सद्भाव र सुरक्षा दिने सबैप्रति कृतज्ञता व्यक्त गर्दै सम्पूर्ण नेपाललाई आफ्नो घर र सबै नेपालीलाई आफन्त मानेको बताए। लामिछानेलाई बोकेको बुद्ध एयरको विमान आकाशमा उडेपछि नेताहरूले टाढैबाट उनको सफल यात्राको कामना गरेका थिए।