बैतडी - बैतडीको पञ्चेश्वरमा बोलेरो जिप दुर्घटना हुँदा जिप चालक सहित ५ जनाका मृत्यु भएको छ । ४ जनाको घटनास्थलमै र एकजनाको अस्पताल ल्याउँदै गर्दा बाटोमै मृत्यु भएको पञ्चेश्वर गाउँपालिकाका अध्यक्ष गोरखबहादुर चन्दले बताए ।

सोमबार चट्याङ लागेर मृत्यु भएका पञ्चेश्वर गाउँपालिका वडा नं ०६ का वडा सदस्य गोविन्द सिंह भण्डारीको शव पोष्टमार्टमका लागि ल्याउँदै गरेको से १ ज १२३ नम्बरको जिप दुर्घटनामा परेको हो ।
 दुर्घटना हुँदा पञ्चेश्वर गाउँपालिका वडा नं ६ का ५० बर्षीय जीतसिंह भण्डारी, ३० बर्षीय डम्मरसिंह भण्डारी, २७ बर्षीय हिक्मत सिंह भण्डारी र  ४० बर्षीय दीपक भण्डारीको घटनास्थलमै मृत्यु भएको जिल्ला प्रहरी कार्यालयका प्रवक्ता प्रहरी निरीक्षक दर्शन खड्काले बताए ।

दुर्घटना परी घाइते भएका चालक तेजबहादुर बोहराको उपचारका लागि ल्याउँदै गर्दा बाटोमै मृत्यु भएको गाउँपालिका अध्यक्ष चन्दले बताए ।  दुर्घटनामा परी घाइते भएका ५ जनालाई उपचारका लागि जिल्ला अस्पताल ल्याउँदै गरेको उनले बताए ।

घाइते हुनेमा सोही ठाउँका ३५ बर्षीय मोहन सिंह भण्डारी, ३० बर्षीय हरि सिंह भण्डारी,२८ बर्षीय मदन सिंह भण्डारी, ५० बर्षीय खेम सिंह भण्डारी, र २४ बर्षीय दिलिप सिंह भण्डारी रहेका छन ।

 जिप सडकबाट करीब ५सय मिटर तल खसेको बताइएको छ । साँघुरो घुम्तीमा जिप दुर्घटना भएको प्रहरीले जनाएको छ ।