घोराही -  नेकपा एमालेका महासचिव शंकर पोखरेलको इच्छाबमोजिम लुम्बिनी प्रदेशको मुख्यमन्त्रीमा चेतनारायण आचार्य नियुक्त हुने भएका छन् ।

नेकपा माओवादी केन्द्रबाट सरकारको नेतृत्व गरेकार जोखबहादुर महराले आइतबार राजीनामा दिएपछि लुम्बिनीमा नयाँ सरकारको बाटो खुलेको थियो ।

प्रदेश प्रमुख अमिक शेरचनले संविधानको धारा १६८ को उपधारा २ बमोजिम नयाँ सरकार गठनका लागि सोमबार अपराह्न ६:३० बजेसम्म दाबी पेस गर्न आह्वान गरेका थिए ।

यस्तोमा यसअघि छोटो समय मुख्यमन्त्री बनेका एमाले संसदीय दलका नेता लिला गिरीले मुख्यमन्त्रीका लागि दाबी पेश गर्न सांसदहरूको हस्ताक्षर पनि जुटाइसकेका थिए । उनले आइतबार नै मुख्यमन्त्रीमा दाबी पेश गर्ने तयारी गरेको अवस्थामा सोमबार एकाएक परिस्थिति बदलिएको हो ।

एमाले महासचिव शंकर पोखरेलले सोमबार बिहान फोन गरेर लुम्बिनीमा लिलाको साटो दलका उपनेता चेतनारायण आचार्यलाई मुख्यमन्त्री बनाउन निर्देशन दिएका हुन् ।

उनले सोमबार बिहान फोन गरेर लिलाको साटो दलका उपनेता आचार्यलाई मुख्यमन्त्री बनाउन निर्देशन दिएको एक सांसदले जानकारी दिए । मुख्यमन्त्रीका लागि दाबी पेश गर्न तम्तयार गिरी महासचिव पोखरेलको फोनका कारण जिल्लिएका छन् । अब कांग्रेससँगको सहमतिअनुसार लुम्बिनीमा एमाले दलका उपनेता आचार्य मुख्यमन्त्री हुने निश्चित भएको छ ।

एमाले लुम्बिनी प्रदेशका मुख्य सचेतक तुलसी चौधरीले चेतनारायणलाई मुख्यमन्त्रीका रुपमा अघि सारेर दाबी पेश गर्न लागिएको बताए ।

‘कांग्रेस र एमालेले मुख्यमन्त्रीमा चेतनारायण आचार्यलाई अघि सारेर सरकार बनाउने गरी दाबी पेश गर्दैछौँ,’ चौधरीले भनेका छन् ।

उनले सोमबार अपरान्ह नै मुख्यमन्त्रीका लागि दाबी पेश गर्दैछन् । दाबी पेश भइसकेपछि उनी सोमबार नै मुख्यमन्त्रीमा नियुक्त हुने छन् ।

यसअघि अल्पमतमा परेपछि मुख्यमन्त्री महराले आइतबार बसेको प्रदेशसभा बैठकमा राजीनामा घोषणा गरेका थिए ।

केन्द्रमा नेपाली कांग्रेस र नेपाल कम्युनिष्ट पार्टी (एमाले)बीच भएको सहमतिअनुसार लुम्बिनीमा सरकारको नेतृत्व एमालेले गर्ने सहमति भएको छ ।

एमालेको नेतृत्वमा नयाँ सरकार गठनका लागि दाबी पेस गर्न आइतबार दुई दलको बैठकसमेत बसेको थियो । बैठकले गिरीलाई मुख्यमन्त्रीका रुपम अघि सार्ने सहमति गरेको थियो। तर उक्त सहमति महासचिव पोखरेलको फोनले भाँडिएको छ ।

अब महासचिव पोखरेलको इच्छाअनुसार आचार्य मुख्यमन्त्री हुँदैछन् । एमाले केन्द्रीय सदस्य आचार्य २०७९ को निर्वाचनमा अर्घाखाँची प्रदेशसभा (१) बाट प्रदेश सभा सदस्यमा विजयी भएका थिए ।