विराटनगर । विराटनगरस्थित उमा गौरी कृषि सहकारीको रकम हिनामिना प्रकरणमा उच्च अदालत विराटनगरले सार्वजनिक लेखा समितिका सभापति ऋषिकेश पोखरेलकी श्रीमती अञ्जला कोइरालासँग १ करोड रुपैयाँ धरौटी माग गर्ने आदेश दिएको छ। यसअघि मोरङ जिल्ला अदालतले उनलाई १० लाख धरौटीमा छाड्ने निर्णय गरेको थियो, जसलाई उच्च अदालतले बदर गरेको हो।

बिहीबार उच्च अदालत विराटनगरका न्यायाधीश विष्णुप्रसाद अर्यालको एकल इजलासले कोइरालासहित चार जना प्रतिवादीसँग जनही एक-एक करोड रुपैयाँ धरौटी माग गर्ने आदेश दिएको हो। कोइरालासँगै धरौटी माग गरिएका अन्य प्रतिवादीहरूमा रोशन राजवंशी, सन्तलाल खवास र ज्योति बास्कोटा रहेका छन्।

यसअघि जिल्ला अदालत मोरङका न्यायाधीश उद्धवप्रसाद भट्टराईको इजलासले गत पुस २४ गते कोइरालालाई १० लाख, बाँस्कोटालाई ५ लाख, सुमन लोहनीलाई २ लाख र मनोजकुमार सोनीलाई १ लाख धरौटीमा रिहा गर्न आदेश दिएको थियो।

जिल्ला अदालतको उक्त आदेश चित्त नबुझेपछि सरकारी वकिलको कार्यालयले प्रतिवादीहरूलाई थुनामा राखेर अनुसन्धान गर्नुपर्ने मागसहित उच्च अदालतमा पुनरावेदन दर्ता गरेको थियो।

मोरङको धनपालथान गाउँपालिकामा सञ्चालित उमा गौरी सहकारी संस्थामा ८,८४२ जना सेयर सदस्यको २२ करोड ४८ लाख २७ हजार रुपैयाँ हिनामिना भएको थियो। छानबिनपछि रकम अपचलन भएको पुष्टि भएपछि गत मङ्सिरमा सञ्चालक समिति सदस्य रहेकी कोइरालासहित २६ जनाविरुद्ध जिल्ला अदालत मोरङमा ठगी मुद्दा दायर गरिएको थियो।