२०८२ साउन २, शुक्रबार
२०८२ साउन २, शुक्रबार
जापान - गैर-आवासीय नेपाली संघ (एनआरएनए) जापानको आसन्न निर्वाचनमा अध्यक्ष पदका उम्मेदवार सुभाष लामिछाने यतिबेला आफ्नो एक पुरानो भिडियोका कारण चर्चामा छन्। चुनावी माहौल तात्दै गर्दा करिब ६ वर्ष पुरानो एक भिडियो सामाजिक सञ्जालमा भाइरल भएपछि उनले सार्वजनिक रूपमा स्पष्टीकरण दिएका छन्। लामिछानेले उक्त भिडियोलाई चुनावी प्रतिस्पर्धीहरूले आफूविरुद्ध प्रयोग गरेको अस्त्रको संज्ञा दिँदै यसमा आश्चर्य व्यक्त गरेका छन्। उनले व्यङ्ग्यात्मक शैलीमा भिडियो आफैँले सेयर गर्दै, "हाई क्वालिटीको भिडियो चाहिएको भए म नै दिन्थें!" भनेर आफ्नो आत्मविश्वास प्रकट गरेका छन्।
भाइरल भिडियोबारे स्पष्ट पार्दै लामिछानेले यो घटना करिब ६ वर्षअघि सँगै खाने-बस्ने साथीहरूबीच भएको सामान्य असमझदारीको परिणाम भएको बताएका छन्। उनका अनुसार, उक्त मनमुटावपछि आपसी मेलमिलाप भइसकेको थियो। भिडियोमा देखिएको अनुहार आफ्नो भएको स्वीकार्दै उनले पीडकका रूपमा चित्रित गरिएका व्यक्ति आफ्नै मिल्ने साथी भएको र आज पनि आफूहरूबीच सुमधुर सम्बन्ध रहेको प्रष्ट पारेका छन्। यो नितान्त व्यक्तिगत मामिला भएको र यसले समाजमा कुनै नकारात्मक असर नपार्ने उनको दाबी छ।
लामिछानेले आफू एक सच्चा नेता भएको र कायर नभएकोमा जोड दिएका छन्। विगतका कुरालाई कोट्याएर सहानुभूति बटुल्ने आफ्नो कुनै मनसाय नरहेको भन्दै उनले आफ्नो वर्तमान र भविष्यमा केन्द्रित भएर समुदायका लागि गर्न सक्ने कामहरूप्रति पूर्ण विश्वस्त रहेको बताएका छन्। उनले जापानबासी नेपाली समुदायका अग्रज, अभियन्ता, पत्रकार, समाजसेवी तथा शुभचिन्तकहरूलाई आफूले समाजलाई हानि पुऱ्याउने कुनै काम नगरेको र भविष्यमा पनि नगर्ने कुरामा ढुक्क रहन आग्रह गरेका छन्।
अन्तमा, उनले एनआरएनए जापानको नेतृत्वमा जो आए पनि समाजकै हितमा काम गर्ने भएकाले मिलेर बसेको नेपाली समाजलाई विभाजन गर्ने गतिविधिमा नलाग्न सबैलाई अनुरोध गरेका छन्। जापानमा रहेका नेपालीहरू विवेकशील भएकाले कसलाई जिताउने भन्ने निर्णय उनीहरूकै हातमा रहेको बताउँदै लामिछानेले उनीहरूको साथ र समर्थनबाटै आफ्नो आगामी यात्रा 'सम्भव छ' भन्ने विश्वास व्यक्त गरेका छन्। यो भिडियो प्रकरणले एनआरएनए जापानको चुनावी प्रतिस्पर्धालाई थप रोचक मोडमा पुऱ्याएको छ।
