काठमाडौं- स्नातक चौथो वर्षको परिक्षा तालिका सच्याउन माग गर्दै आन्दोलनरत विद्यार्थीले त्रिभुवन विश्वविद्यालयका सहायक परिक्षा नियन्त्रक डा. घनश्याम ठाकुरलाई कालो मोसो दलेका छन ।

त्रिविले परिक्षा फारम भरे लगत्तै परिक्षा गर्ने गरी लागेको भन्दै केही दिन देखि विद्यार्थीहरु आन्दोलित छन् । २१ महिनासम्म परिक्षा फल प्रकाशित गर्न नसक्ने त्रिविले निजी क्याम्पस संचालकको डिजाइनमा क्यालेण्डर मिचेर परिक्षा तालिका सार्वजनिक गरेको विद्यार्थीहरुको आरोप लगाएका छन् ।

केही दिन देखि शान्तिपूर्ण आन्दोलन मार्फत मागहरु राखेपनि सुनुवाई नभएपछि अप्रिय निर्णय लिनुपरेको विद्यार्थीहरुले बताए । यसअघि त्रिविले परिक्षा फारम भरेको अन्तिम मितिको ३५ दिन पछि मात्रै परिक्षा लिने गरी तालिका तय गर्ने गरेको थियो ।

यसपटक परिक्षा फारम भर्ने अन्तिम मितिको तीन दिन पछि नै परिक्षा गर्ने तयारी परिक्षा नियन्त्रक कार्यालयले गरेपछि विद्यार्थी आक्रोशित बनेका हुन् । विद्यार्थीलाई समस्या पर्ने गरी परिक्षा तालिका सार्वजनिक गरेको भन्दै उनीहरुले आपत्ति जनाउदै आएका थिए । आज परिक्षा नियन्त्रण कार्यालयमा धर्ना दिने क्रममा डा.ठाकुरमाथि मोसो दलेका हुन् ।

त्रिविले अविलम्ब सो परिक्षा तालिका सच्चाएर आफ्नो गल्ति सच्याउनुपर्ने विद्यार्थीहरुको माग छ ।