काठमाडौं - नेकपा एमालेका केन्द्रीय सदस्य ऐन महर विद्युतीय अपराधको उजुरीमा पक्राउ परेका छन्। जिल्ला अदालत काठमाडौँले बुधबार उनीविरुद्ध पक्राउ पुर्जी जारी गरेपछि प्रहरीले नियन्त्रणमा लिएको हो।

महरमाथि चरित्रहत्या र गाली बेइज्जती गरेको भन्दै साइबर ब्युरो भोटाहिटीमा उजुरी परेको थियो। प्रहरी स्रोतका अनुसार, पीडितले हुलाकमार्फत दिएको उजुरीका आधारमा अनुसन्धान अघि बढेको थियो। पक्राउपछि प्रहरीले महरलाई थप अनुसन्धानका लागि म्याद थप गर्न जिल्ला अदालत काठमाडौँ लगेको छ।

बझाङका स्थायी बासिन्दा महर विद्यार्थी राजनीतिबाट एमालेमा आएका हुन्। उनी अनेरास्ववियुको अध्यक्ष भइसकेका छन्। २०७८ मंसिरमा एमालेले उनलाई केन्द्रीय सदस्य मनोनित गरेको थियो। गत प्रतिनिधिसभा निर्वाचनमा उनी बझाङबाट उम्मेदवार बनेका थिए तर नेकपा एकीकृत समाजवादीका नेता भानुभक्त जोशीसँग पराजित भएका थिए।

महर यसअघि पनि विवादमा तानिएका थिए। एक महिलाले आफू बलात्कृत भएको भन्दै उनीविरुद्ध प्रहरीमा जाहेरी दिएकी थिइन्। त्यसैगरी, यौन विचलनसम्बन्धी अडियो सार्वजनिक भएपछि पार्टीले उनलाई एक पटक निलम्बन गरेको थियो। तर, पछि सचिवालय बैठकको निर्णयबाटै उनलाई जिम्मेवारीमा फर्काइएको थियो।