काठमाडौं: पछिल्लो २४ घण्टायता देशभर ४ हजार ५४४ जना कोरोनामुक्त भएका छन् । योसँगै नेपालमा हालसम्म ५ लाख ६४ हजार ८८२ कोरोना संक्रमित निको भइसकेका छन् ।

त्यस्तै मंगलबार थप ४ हजार ५२२ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार देशभरका प्रयोगशालामा १६ हजार ९१३ जनाको पिसिआर र एन्टीजेन परीक्षण गर्दा ४ हजार ५२२ जनामा कोराना पुष्टि भएको हो ।

मन्त्रालयका अनुसार १२ हजार २०४ जनाको पिसिआर र ४ हजार ७०९ जनाको एन्टीजेन परीक्षण गर्दा पिसिआरमार्फत ३ हजार ७०३ जना र एन्टीजेटमार्फत ८१९ जना संक्रमित पुष्टि भएका हुन् ।

धौलागिरी अस्पतालमा पुराना मितिमा भएका परीक्षणहरूसमेत प्राप्त भएकाले प्रतिवेदनमा एकमुष्ट विवरण समावेश गरिएको स्वास्थ्य मन्त्रालयले जानकारी दिएको छ ।

पछिल्लो २४ घण्टायता देशभर ४१ जना संक्रमितको मृत्यु भएको छ । योसँगै हालसम्म ८ हजार ८१३ जना संक्रमितको मृत्यु भएको छ ।