२०८२ भदौ १४, शनिवार
२०८२ भदौ १४, शनिवार
बाजुरा। बाजुराको हिमाली गाउँपालिकास्थित बिच्छ्या खोलामा गएराति आएको भीषण बाढीले ११ घर बगाएको छ भने दर्जनौं घर जोखिममा परेका छन्। अविरल वर्षापछि आएको बाढीले मध्यरातमा गाउँ पस्दा ठूलो भौतिक क्षति भएको हो।
जिल्ला प्रहरी कार्यालय, बाजुराका अनुसार बाढीले ११ घर पूर्ण रूपमा बगाएको, ७ घरमा आंशिक क्षति पुर्याएको र अन्य १७ घर उच्च जोखिममा रहेका छन्। प्रहरी निरीक्षक देवबहादुर चौधरीले हिमाली गाउँपालिकाको वडा नम्बर १, ३ र ५ मा सबैभन्दा बढी असर परेको जानकारी दिनुभयो। उहाँका अनुसार, विपद् प्रभावित क्षेत्रमा प्रहरी टोली खटिएर क्षतिको विस्तृत विवरण सङ्कलन गरिरहेको छ।
बाढीले स्थानीयको घर मात्र नभई सरकारी कार्यालय, विद्यालय र अन्य सार्वजनिक संरचनामा समेत क्षति पुर्याएको छ, जसले गर्दा स्थानीय जनजीवन प्रभावित बनेको छ।
सुदूरपश्चिममा भारी वर्षा, सतर्कता अपनाउन आग्रह
यसैबीच, पछिल्लो २४ घण्टामा सुदूरपश्चिम प्रदेशका विभिन्न जिल्लामा भारी वर्षा मापन गरिएको छ। जल तथा मौसम विज्ञान विभागका अनुसार बैतडीमा १२७ मिलिमिटरभन्दा बढी वर्षा भएको छ। त्यसैगरी, कैलाली, डोटी, अछाम लगायतका जिल्लामा पनि निरन्तर भारी वर्षा भइरहेको छ।
यस्तै, मौसम पूर्वानुमान महाशाखाले आज राति कोशी प्रदेशका पहाडी भू-भागका एक-दुई स्थानमा भारी वर्षाको सम्भावना रहेको जनाउँदै आवश्यक सतर्कता अपनाउन सबैमा आग्रह गरेको छ।
