काठमाडौँ - राष्ट्रपति रामचन्द्र पौडेलले सर्वोच्च अदालतका लागि तीन जना नयाँ न्यायाधीश नियुक्त गर्नुभएको छ। न्याय परिषद्ले गरेको सिफारिसलाई अनुमोदन गर्दै राष्ट्रपति पौडेलले उहाँहरूलाई नियुक्त गर्नुभएको हो।

राष्ट्रपति कार्यालयका अनुसार नियुक्त हुने न्यायाधीशहरूमा वरिष्ठ अधिवक्ता मेघराज पोखरेल, उच्च अदालत जनकपुरका मुख्य न्यायाधीश श्रीकान्त पौडेल र उच्च अदालत दिपायलका मुख्य न्यायाधीश शान्तिसिंह थापा रहनुभएको छ।

राष्ट्रपति कार्यालयद्वारा जारी विज्ञप्तिमा नेपालको संविधानको धारा १२९ को उपधारा (२) बमोजिम उहाँहरूलाई सर्वोच्च अदालतको न्यायाधीश पदमा नियुक्त गरिएको उल्लेख छ। यो नियुक्तिसँगै सर्वोच्च अदालतमा न्यायाधीशको संख्याले पूर्णता पाउने प्रक्रिया अघि बढेको छ।