नेकपा कार्यदल बैठक शनिबार पनि बस्ने भएको छ । १७ गतेदेखि सुरु भएको एमाले कार्यदल बैठकपछि नेताहरुले भोलि सहमति हुने भन्दै टारे पनि १० दिन लगातार बैठक बस्दा पनि सहमति हुन सकेन । 

राजधानीको चपली घुम्तीस्थित सञ्चार व्यवसायी रामेश्वर थापा निवासमा ३० वैशाखमा केपी शर्मा ओली र माधवकुमार नेपालले आफूहरुबीचको झण्डै दुई महिनाको बिग्रह मत्थर गर्न कार्यदल बनाउने सहमति भएको थियो । उक्त सहमतिपछि समानान्तर अभ्यास गर्दै आएका एमालेका दुई समूहबीच मिलन हुने अपेक्षा गरिएको थियो । 

कार्यदल गठन भए पनि ओली संसद् विघटन गरेपछि दुई समूहबीचको दूरी बढ्दै गएर नेपाल समूहले प्रधानमन्त्रीका लागि देउवालाई समर्थन गर्न तयार भए । नेपाल समूहले देउवालाई समर्थन गरेपछि ओल समूहले कारबाही अघि बढायो र नेता नेपालसहित ११ जनालाई साधारण सदस्यसमेत नरहने गरि कारबाही गरियो । 

बैठक जारी भए पनि कुनै सहमति हुन नसकेपछि बिहीबाट नेपाल समूहका कार्यदल सदस्यहरु आक्रोशित बने । नेपाल समूहका नेता घनश्याम भुसालले १० दिन अघिकै अवस्थामा रहेको र कुनै प्रगति नभएको बताए । तर, ओली समूहका नेता सुवास नेम्वाङले भने सहमति नजिक पुगेको र भोलि सहमति हुने बताए । तर, उनको भोलि आएको छैन । 

सहमतिकै लागि एमाले कार्यदल बैठक शनिबार अपराह्न बस्ने बताइएको छ । समय भने उल्लेख गरिएको छैन ।