नयाँ सरकार गठनका लागि विपक्षी गठबन्धनले राष्ट्रपति विद्यादेवी भण्डारीले दिएको समय सीमाभित्रै बहुमत जुटाएर नयाँ सरकार गठनको दाबी पेश गर्न राष्ट्रपति कार्यालय शितलनिवास प्रस्थान गरेको छ ।

शुक्रबार बिहान कांग्रेस सभापति शेरबहादुर देउवाको निवासमा भएको नेताहरुको छलफलपछि देउवालाई प्रधानमन्त्रीका रुपमा अघि सारेर सरकार गठन गर्न बहुमत जुटाउने प्रयासलाई तीव्रता दिइएको थियो । सोही अनुसार विपक्षी गठबन्धनले सांसदहरुको हस्ताक्षर संकलन सुरु गरेका हुन् ।  विपक्षी गठबन्धनले राष्ट्रपतिको आह्वानअनुसार सरकार गठनका लागि १४९ जना सांसदको हस्ताक्षर जुटाएको दाबी गरेका छन् । स्रोतका अनुसार कांग्रेस सभापति शेरबहादुर देउवालाई प्रधानमन्त्रीको रुपमा अघि सार्दै हस्ताक्षर संकलन गरिएको हो ।

 शुक्रबार बिहानदेखि विभिन्न तहमा भएका छलफलमा कांग्रेस, माओवादी केन्द्र, जनता समाजवादीका अध्यक्ष उपेन्द्र यादव समूह र एमालेकै माधवकुमार नेपाल समूहका सांसदहरुको हस्ताक्षरमा प्रधानमन्त्रीको दावा प्रस्तुत गर्ने तयारी भएको बताइएको छ ।