२०८२ जेठ २६, सोमबार
२०८२ जेठ २६, सोमबार
नेपाली कांग्रेस संस्थापनइतर समूहले पार्टीको १४ औं महाधिवेशनका लागि साझा उम्मेद्वार चयन गर्न बोलाएको बैठक निष्कर्षविहीन टुंगिएको छ । संस्थापनतर्फबाट सभापति देउवाले उम्मेद्वारी दिने घोषणा गरेपछि देउवालाई परास्त गर्न साझा उम्मेद्वार बनाउनुपर्नेमा पौडेल समूह एकमत भए पनि कसलाई साझा उम्मेद्वार बनाउने भन्ने विषयमा भने एकमत हुन सकेको छैन ।
पौडेल समूहका आठजनाले सभापतिमा दाबी गरेका छन् । जसमध्ये सभापतिमा दाबी गरेका युवा नेता कल्याण गुरुङलाई भने बैठकमा बोलाइएको थिएन । शुक्रबार बसेको बैठकले विभिन्न हाँगामा छरिएका रहेका संस्थापनइतर गुटहरुबीच एकता कायम गर्ने सहमति भएको सभापतिका आकांक्षी अर्जुननरसिंह केसीले जानकारी दिएका छन् ।
नेताहरुले आ-आफ्नो उम्मेद्वारीको अडान कायम राख्दा कसलाई सभापति बनाउने भन्ने विषयको टुंगो लगाउन सकस भएको बताइएको छ । पौडेल समूहको बिहीबारको बैठक पनि निष्कर्षविहीन भएको थियो ।
बैठकमा सभापतिका आकांक्षीहरु वरिष्ठ नेता रामचन्द्र पौडेल, महामन्त्री शशांक कोइराला, प्रकाशमान सिंह, कृष्ण सिटौला, डा. रामशरण महत, सुजाता कोइराला, डा. शेखर कोइराला, बलबहादुर केसीलगायतको सहभागिता थियो ।
पौडेल समूहले आफ्नो समूहका सभापतिका आकांक्षी बोलाएको बताए पनि गुरुङलाई भने बोलाइएको थिएन ।
सभापतिका आकांक्षी नेतृ सुजाता कोइरालाले भने सहमतिमै उम्मेद्वार हुने दाबी गरेकी छन् । उनले भनिन्, "मैले आफ्नो कुरा राखे । अरुको कुरापनि सुन्यौं । जो भएपनि एकजना उम्मेदवार हुन्छ । सहमति हुनेमा शंका छैन । हार्दिकतासाथ छलफल भयको छ ।"
