काठमाडौं - राष्ट्रिय प्रजातन्त्र पार्टी (राप्रपा) ले आफूले बहिष्कार गरेको प्रतिनिधिसभा बैठकको भत्ता नलिने भएको छ। पार्टीले असार १ गतेको बैठकमा अनुपस्थित रहेकाले उक्त दिनको भत्ता नलिने निर्णय गरेको हो।

राप्रपाका प्रमुख सचेतक ज्ञानबहादुर शाहीले संघीय संसद सचिवालयलाई पत्र लेखेर सो दिनको भत्ता पार्टीका सांसदहरूको नाममा निकासा नगर्न र सरकारी राजस्वमा फिर्ता गर्न आग्रह गरेका छन्।

‘भिजिट भिसा प्रकरण’ मा छानबिन समितिको माग गर्दै प्रतिपक्षीले गरेको विरोधका बीच बैठक सञ्चालन गरिएको भन्दै राप्रपाले बैठक बहिष्कार गरेको थियो।

पार्टीले सचिवालयलाई पठाएको पत्रमा भनिएको छ, “उक्त दिनको बैठक भत्ता लिनु नैतिक र सैद्धान्तिक रूपमा उचित नहुने ठहर गर्दै राप्रपा संसदीय दलले मिति २०८१ असार १ गतेको संसद बैठकको भत्ता नलिने निर्णय गरेको व्यहोरा यसै पत्रमार्फत जानकारी गराउँदछौँ।”