काठमाडौं - बागमती प्रदेशका मुख्यमन्त्री बहादुर सिंह लामाले आइतबार पदबाट राजीनामा दिएका छन्। मुख्यमन्त्री तथा मन्त्रिपरिषद्को कार्यालयमा आयोजित पत्रकार सम्मेलनमा उनले राजीनामाको घोषणा गरेका हुन् ।

नेपाली कांग्रेस संसदीय दलभित्रको आन्तरिक विवाद र त्यसपछि आएको अविश्वास प्रस्तावका कारण उनले पद छाड्न बाध्य भएका हुन्। साउन ८ गते मुख्यमन्त्री नियुक्त भएका लामाविरुद्ध २१ सांसदको हस्ताक्षरसहित अविश्वास प्रस्ताव दर्ता भएको थियो। साउन १४ गते भएको मतदानमा २२ सांसदले प्रस्तावको पक्षमा मत दिएपछि लामा पराजित भएका थिए।

पत्रकार सम्मेलनमा लामाले आफू इमानदार भएको कारण यस्तो परिस्थिति आएको दाबी गर्दै जिम्मेवारीबाट अलग हुने निर्णय लिएको बताए। सुरुमा संवैधानिक व्यवस्था देखाउँदै पद नछाड्ने अडान लिएका उनले पार्टी सभापति शेरबहादुर देउवाको निर्देशनपछि अन्ततः राजीनामा दिएका हुन्।

लामाको राजीनामासँगै बागमती प्रदेशमा नयाँ सरकार गठनको प्रक्रिया सुरु हुनेछ। नेपाली कांग्रेस संसदीय दलका नवनिर्वाचित नेता इन्द्रबहादुर बानियाँ नयाँ मुख्यमन्त्री बन्ने तयारीमा छन्। उनी बागमती प्रदेशका छैटौं मुख्यमन्त्री हुनेछन्।