काठमाडौं – नेकपा (माओवादी केन्द्र)ले समाजवादी मोर्चामा आबद्ध दलहरूसँग एकताका लागि औपचारिक वार्ता गरिरहेको खुलासा गरेको छ। पार्टीका उपमहासचिव वर्षमान पुनले स्थायी कमिटी बैठक चलिरहेको पेरिसडाँडामा सञ्चारकर्मीहरूसँग कुरा गर्दै विचार मिल्ने दलहरूसँग एकता गर्नु पार्टीको औपचारिक एजेन्डा नै भएको बताए।

उनले नेकपा (एकीकृत समाजवादी) र विप्लव नेतृत्वको नेकपासँगको वार्तालाई इंगित गर्दै भने, “हामी हल्लाखल्ला नगरी छलफललाई अघि बढाइरहेका छौँ। कुनै असमझदारी भए त्यसलाई वार्ताबाटै टुंग्याउँछौँ।”

पछिल्लो समय अध्यक्ष प्रचण्ड र नेता जनार्दन शर्माबीचको मतभेदले पार्टी फुट्नसक्ने हल्ला चलिरहेका बेला पुनले त्यसलाई ठाडै अस्वीकार गरे। “‘माओवादी कुनै हालतमा फुट्दैन,’ उनले दृढतापूर्वक भने, ‘बाहिर चलेका हल्लालाई हामी पूरा हुन दिँदैनौँ। पार्टीभित्रका विषयहरू आन्तरिक छलफलबाटै समाधान हुन्छन्।’”

उनले पार्टीभित्र बोल्ने र आफ्नो कुरा राख्ने स्वतन्त्रता सबैलाई भएको तर त्यसकै आधारमा कसैलाई कारबाही नगरिने स्पष्ट पारे। पार्टीभित्रका गुटहरू अन्त्य गर्दै अध्यक्ष प्रचण्डकै नेतृत्वमा पार्टी एकढिक्का भएर अघि बढ्नेमा उनले विश्वास व्यक्त गरे र जारी बैठकले यही निष्कर्ष निकाल्ने दाबी गरे।