काठमाडौं - मंगलबार नेपालको शेयर बजारमा ऐतिहासिक उछाल देखिएको छ। नेप्से परिसूचक ८०.९७ अंकले बढेर २९७३.७० अंकको विन्दुमा पुगेको छ, जुन गत वर्षको भदौ २ गतेपछिकै सबैभन्दा उच्च हो। कारोबार सुरु भएदेखि अन्तिम समयसम्म उकालो लागेको बजारले लगानीकर्तामा उत्साह थपेको छ। यो वृद्धिसँगै कारोबार रकममा पनि उल्लेख्य सुधार आएको छ। अघिल्लो दिन १६ अर्ब ३२ करोड रुपैयाँको कारोबार भएकोमा आज त्यो बढेर २० अर्ब ८ करोड रुपैयाँ पुगेको छ।

बजारको वृद्धि चौतर्फी रह्यो, जहाँ कुल २३६ कम्पनीको शेयर मूल्य बढ्यो भने १४ वटाको मात्र घट्यो। उत्पादन तथा प्रशोधन, जीवन बीमा र माइक्रोफाइनान्स समूहमा ४ प्रतिशतभन्दा बढीको वृद्धि देखियो। त्यसैगरी, बैंकिङ, विकास बैंक, वित्त, होटल तथा पर्यटन, हाइड्रोपावर लगायतका अन्य सबै समूहका सूचकहरू पनि उकालो लागेका छन्।

आज तीन कम्पनीको शेयर मूल्यमा १० प्रतिशतको सकारात्मक सर्किट लागेको छ। जसमा ट्रेड टावर, सान्भी इनर्जी र शिवम् सिमेन्ट रहेका छन्। उन्नति सहकार्य लघुवित्त र विन्ध्यबासिनी हाइड्रोपावर जस्ता कम्पनीको मूल्य पनि करिब १० प्रतिशतले बढ्यो। कारोबार रकमका आधारमा नेपाल पुनर्बीमा कम्पनी, शिवम् सिमेन्ट, हिमालयन रिइन्स्योरेन्स, बुटवल पावर र ङादी ग्रुप सबैभन्दा अगाडि रहे।

यो ऐतिहासिक वृद्धिसँगै बजारको कुल पुँजीकरणले पनि नयाँ कीर्तिमान बनाएको छ। सूचीकृत सबै शेयरहरूको बजार मूल्य ४९ खर्ब ६२ अर्ब रुपैयाँ पुगेको छ, जुन हालसम्मकै सबैभन्दा धेरै हो। बजारको यो गतिले आगामी दिनमा पुँजीकरणमा थप नयाँ कीर्तिमानहरू बन्ने सम्भावना बढाएको छ।