एजेन्सी - बेन डकेटको उत्कृष्ट शतकको मद्दतले इंग्ल्याण्डले भारतविरुद्धको पहिलो टेस्टमा ३७१ रनको विशाल लक्ष्य पछ्याउँदै ५ विकेटको रोमाञ्चक जित निकालेको छ। यो कीर्तिमानी जितसँगै इंग्ल्याण्डले पाँच म्याचको एन्डरसन–तेन्दुलकर ट्रफीमा १-० को अग्रता बनाएको छ।

हेडिङ्ग्लेमा भएको खेलको अन्तिम दिन इंग्ल्याण्डलाई जितका लागि ३५० रन आवश्यक थियो। दिनको सुरुवात गरेका बेन डकेट र ज्याक क्राउली (६५ रन) ले पहिलो विकेटका लागि १८८ रनको सानदार साझेदारी गर्दै जितको बलियो आधार तयार पारे। डकेटले १४९ रनको विस्फोटक पारी खेले।

तर, शार्दुल ठाकुरले डकेट र ह्यारी ब्रुकलाई लगातार दुई बलमा आउट गरेपछि खेलमा भारतले पुनरागमनको प्रयास गरेको थियो। प्रसिद्ध कृष्णले पनि दुई विकेट लिएर भारतीय आशा जगाए। यद्यपि, एकातर्फबाट टिकिरहेका अनुभवी जो रुट (अविजित ५३ रन) र डम स्मिथ (अविजित ४४ रन) ले ७१ रनको अविजित साझेदारी गर्दै इंग्ल्याण्डलाई जित दिलाए। स्मिथले रविन्द्र जडेजालाई छक्का प्रहार गर्दै विजयी रन बनाएका थिए।
यो हार भारतका लागि निकै निराशाजनक बन्यो। टेस्ट क्रिकेटको इतिहासमा पहिलो पटक कुनै टोलीले एकै खेलमा पाँच शतक (शुभमन गिल, यशस्वी जायसवाल, केएल राहुल र ऋषभ पन्तले दुवै इनिङ्समा) बनाएर पनि हार बेहोर्नुपरेको छ। पन्तले दुवै इनिङ्समा अविश्वसनीय प्रदर्शन गर्दै १३४ र ११८ रन बनाए, तर उनको प्रयास पर्याप्त भएन।

भारतका लागि पहिलो इनिङ्समा ५ विकेट लिएका जसप्रित बुमराह दोस्रो इनिङ्समा विकेटविहीन रहे। इंग्ल्याण्डको आक्रामक 'बाजबल' रणनीतिसामु भारतीय बलिङ कमजोर देखियो।

यो इंग्ल्याण्डको टेस्ट इतिहासमा दोस्रो ठूलो सफल रन चेज हो। बेन डकेट आफ्नो उत्कृष्ट प्रदर्शनका लागि 'म्यान अफ द म्याच' घोषित भए।
हारपछि भारतीय कप्तान शुभमन गिलले भने, "यो एक उत्कृष्ट खेल थियो, तर हामीले केही महत्वपूर्ण क्याच छोड्यौं जसले गर्दा हार बेहोर्नुपर्‍यो। हामी अर्को खेलमा कमजोरी सुधार गर्नेछौं।"

अब दुई टोलीबीचको दोस्रो टेस्ट जुलाई २ देखि बर्मिङहमको एजबास्टनमा सुरु हुनेछ।