२०८२ बैशाख ११, बिहिबार
२०८२ बैशाख ११, बिहिबार
काठमाडौँ- चुनावअघि १५० सिट जितेर एकल बहुमतको सरकार बनाउने घोषणा गरेको नेकपा एमालेले कमजोर नतिजा आएपछि चुनावका क्रममा भएका कमी कमजोरीबारे समीक्षात्मक प्रतिवेदन तयार पार्ने भएको छ ।
एमाले केन्द्रीय निर्वाचन विभागको बुधबार बसेको बैठकले चुनावको समग्र पक्षलाई समेटेर प्रतिवेदन तयार गर्ने निर्णय गरेको हो । महासचिव शंकर पोखरेलको उपस्थिति र उप–महासचिव प्रमुख विष्णु रिमालको अध्यक्षतामा बसेको बैठकले एक साताभित्र प्रतिवेदन तयार गर्ने निर्णय गरेको एमाले केन्द्रीय निर्वाचन उपप्रमुख नीरज आचार्यले जानकारी दिए ।
उनले बैठकले प्रतिनिधि सभा र प्रदेश सभा निर्वाचनको समग्र समीक्षा प्रतिवेदन तयार गर्नुका साथै वार्षिक क्यालेन्डर कार्यन्वयन लगायतका महत्वपुर्ण योजना बनाएको बताए ।
मंसिर ४ मा सम्पन्न प्रतिनिधि र प्रदेश सभा सदस्य निर्वाचनमा नेपाली काँग्रेस ८९ सिटसहित पहिलो दल बन्दा एमाले दोस्रो दल बनेको छ । उसले प्रत्यक्षतर्फ ४४ र समानुपातिकतर्फ ३४ सिटमात्र जितेको छ । समानुपातिकतर्फ भने एमालेले सवैभन्दा धेरै मत ल्याएको छ ।
एमालेले तयार गर्ने प्रतिवेदनमा पार्टी कमिटीका तर्फबाट भएका कमीकमजोरी, राज्यपक्षबाट भएका धाँधली, पार्टीभित्रै भएको अन्तर्घात, पार्टीका घोषणापत्र र प्रतिवद्धताका सवल र दुर्वल पक्षलाई समेट्नेछ ।
