काठमाडौं - नेपाल प्रिमियर लिग (एनपीएल) को ट्रेडमार्कसम्बन्धी विवादमा नेपाल क्रिकेट संघ (क्यान) ले कानुनी लडाइँ जितेको छ। उद्योग विभागले जोरा स्पोर्ट्स म्यानेजमेन्टका प्रमुख अमिर अख्तरले गरेको दाबीलाई खारेज गर्दै क्यानको पक्षमा फैसला सुनाएको हो।

विभागको यो फैसलासँगै क्यानलाई एनपीएलको दोस्रो संस्करण आयोजना गर्नका लागि रहेको कानुनी अड्चन हटेको छ।

अख्तरले 'नेपाल प्रिमियर लिग (एनपीएल)' को ट्रेडमार्क आफ्नो नाममा रहेको भन्दै उद्योग विभागमा मुद्दा दायर गरेका थिए। उनको दाबी थियो कि 'नेपाल प्रिमियर लिग प्रालि' आफ्नो कम्पनीको नाममा दर्ता भएकाले सोही नाममा अन्य कसैले प्रतियोगिता गर्न पाउँदैन।

यसअघि अख्तरले एनपीएल नामबाट प्रतियोगिता आयोजना गरे पनि क्यानले मात्र आधिकारिक रूपमा यस्तो प्रतियोगिता गर्न सक्ने भन्दै विरोध भएपछि नाम परिवर्तन गरेर 'एभरेस्ट प्रिमियर लिग' (ईपीएल) बनाएका थिए।