टोकियो । आगामी नोभेम्बर ८ देखि १५ सम्म जापानको टोकियोमा मिनी नेपाल निर्माण गर्ने पवित्र उद्देश्यले धार्मिक सद्भाव सहितको सप्ताहब्यापी श्रीमद्भागवत ज्ञान महायज्ञ हुने भएको छ । सो महायज्ञमा  धार्मिक एकताको सन्देश सहित हिन्दु र बौद्ध धर्मका दुई गुरुहरुले एउटै मञ्चवाट कथा वाचन गर्नुहुने भएको हो । यस महायज्ञको आयोजना गरेको हो गैर आवासिय नेपाली संघ (एनआरएनए) जापानले र यसमा साथ दिएका छन् जापानमा क्रियाशिल सामाजिक संघ संस्थाहरुले ।

एनआरएनए जापानले ड्रिम प्रोजेक्टको रुपमा अघि सारेको एकिकृत नेपाली घर : बहु साँस्कृतिक केन्द्र निर्माणका लागि आर्थिक स्रोत जुटाउने उदेश्यले आयोजना गर्न लागिएको महायज्ञमा वाचनप्रवीण पण्डित दीनबन्धु पोखरेल र महान बौद्ध गुरु टुल्कु सोनाम गर्वाङ रिम्पोछेले कथा वाचन गर्नुहुने भएको छ । एकिकृत नेपाली घर निर्माणका लागि स्रोत जुटाउने महायज्ञको मुलभुत उद्देश्य भएता पनि जापानमा नेपालीहरुबीचको एकता, भाइचारा र एक अर्का पुस्ताबीचको पारस्परिक सम्बन्धलाई थप मजबुत बनाउँदैं आध्यात्मिक चिन्तनको उजागर गर्न र गराउन महायज्ञ कार्यक्रमको आयोजना गरिएको आयोजक संस्थाले जानकारी दिएको छ । 

एनआरएनए जापानका निवर्तमान अध्यक्ष नविन निउरे नेतृत्वको कार्यकालमा चिवा केनमा करिब ३ करोड बराबरको जग्गा खरिद गरिएको र सोही जग्गामा एकिकृत नेपाली घर बनाउन आर्थिक स्रोत जुटाउने अभिप्रायले महायज्ञ आयोजना गर्न लागिएको हो । 

सप्ताहब्यापी ज्ञान महायज्ञको पहिलो दिन नोभेम्बर ८ मा ‘शान्तिका लागि सप्ताहस्थल भित्रै मण्डव परिक्रमा गरि कलशयात्रा हुनेछ । बाह्य पार्कबाट यात्रा सुरु गरी शहरको केहि क्षेत्रमा घुमेर कलश यात्रा गर्ने भनि तय गरिएकोमा जापानमा रहेका नेपाली समुदायले देखाउनुभएको चासो, सुझाव र चिन्तालाई गम्भीरतापूर्वक आत्मसात् गर्दै प्रारम्भिक योजना लाई परिवर्तन गर्दै सप्ताहस्थल भित्रै मण्डव परिक्रमा गरि कलश यात्रा गरिने कार्यक्रम तय भएको कलश यात्रा सयोजक कामना भण्डारीले जानकारी दिनुभएको छ । 

र सोही दिन बिहान दश बजे दुबै धर्मका दुबै गुरुज्युहरुको करकमलवाट उद्घाटन गरि सप्ताहव्यापी महायज्ञको सुरुवात हुने भएको छ । नोभेम्बर ९ देखी १५ सम्म भने पहिलो चरणमा बौद्ध धर्मगुरु रिम्पोछे ले कथा वाचन गर्नुहुनेछ भने दोस्रो चरणमा वाचन प्रविण दिनबन्धुले आध्यात्मिक प्रवचन दिनुहुने कार्यतालिका सार्वजनिक गरिएको छ ।