२०८२ जेठ २५, आईतबार
२०८२ जेठ २५, आईतबार
पोखरा । कास्कीको माछापुच्छ्रे गाउँपालिकामा निर्माणाधीन सेती जलविद्युत परियोजनाका सञ्चालकहरुको समूहले स्थानीयबासीसँग छलफल तथा अन्तरक्रिया गरेको छ । गाउँपालिकाकाे वडा नं १, २, ३ र ४ का वडा अध्यक्षहरु सहित, सामाजिक निर्देशक र स्थानीयबासीसँग छलफल तथा अन्तरक्रिया भएको हो । 
उक्त अवसरमा बोल्दै परियोजनाका अध्यक्ष जगत पोखरेलले माछापुच्छ्रेमा परियोजना अगाडि बढाउँदा स्थानीयबासी र स्थानीय तहबाट राम्रो सहयोग प्राप्त भएको भन्दै बिषेश धन्यवाद ज्ञापन गरेका थिए । परियोजना सफल बनाउन आफ्नोतर्फबाट सक्दो सहयोग गर्ने स्थानीयबासी तथा जनप्रतिनिधिहरुले बताएका छन् ।
त्यसैगरी प्रदेश प्रमुख कृष्णचन्द्र नेपाली पोखरेल, कास्कीका प्रमुख जिल्ला अधिकारी थानेश्वर गौतम लगायतसँग पनि परियोजनाको टोलीले भेटघाट तथा छलफल गरेको छ । स्थानीय सामाजिक व्यक्तित्वहरु, पोखराका सञ्चालकहरु, वडा नं २ का सरकारी कार्यालय प्रमुखहरु, ट्राइ पार्टी (क्लाइण्ट, कन्सल्टेण्ट, सिभिल, एचएम, इएम कन्ट्राक्टर) को संयुक्त बैठक पनि सम्पन्न भइ आयोजनाको मास्टर सेडुल तयार लगायतको महत्त्वपूर्ण कार्यक्रमहरु सम्पन्न भएको अध्यक्ष पोखरेलले जानकारी दिए ।
त्यस्तै सञ्चालक समितिको बैठक पनि सम्पन्न भएको छ । परियोजनामा स्पाइरल पाइप जोड्न (इरेक्सन) का लागि शिलन्यास, ट्राइ पार्टी र लगानीकर्ता सहित बैठक बसी मास्टर सेडुलबारे सहमति भएको छ । ‘सामुहिक रुपमा साइट भिजिट गरि आयोजनाको कार्य प्रगति अवलोकन तथा निरीक्षण भएको छ,’ पोखरेलले भने । डेढ वर्ष अगाडिबाट निर्माणाधीन परियोजनाको काम सिभिलतर्फ ४५ प्रतिशत भन्दा बढी सम्पन्न भइसकेको छ ।
