काठमाडौँ- नेकपा एमालेका अध्यक्ष केपी शर्मा ओलीले रोइकराई गरेपछि मात्रै गठबन्धनका नेताहरुले चुनावी सभामा बोल्न पाएको बताएका छन् ।अध्यक्ष ओलीले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधवकुमार नेपालले रोइकराइ गरेपछि मात्रै बोल्न पाएको टिप्पणी गरे । 

बिहीबार कैलालीको बौनियामा आयोजित एमालेको वृहत चुनावी सभालाई सम्बोधन गर्दै ओलीले कांग्रेसले सातै प्रदेशमा प्रचण्ड र दाहाललाई बोल्न नदिने तयारी गरेको र बालुवाटारमा अनुनय विनलय गरेपछि मात्रै बोल्ने अवसर जुटेको बताए । 

‘मेरी छोरीको उम्मेदवारी छ मेयरमा, मेरी छोरीको क्षेत्रमा काँग्रेसका सभापतिले बोल्ने, मलाई जान नदिने रु भनेर प्रचण्डले भनेपछि प्रचण्ड र माधव नेपाल दुवैलाई बोल्न दिएको छ भरतपुरमा,’ ओलीले भने । एमालेमा अपमान भयो भनेर हिँडेका माधव नेपाललाई अहिले काँग्रेसले बोल्न नदिँदा अपमान महसुस नभएको भन्दै ओलीले व्यङ्ग्य गरे । उनले प्रचण्ड तत्कालीन नेकपाको अध्यक्ष हुँदा सिंहजस्तो भएपनि अहिले ‘भिजेको बिरालो होइन, मुसोजस्तो’ भएको बताए ।

त्यस्तै, उनले निर्वाचन आयोगले एमालेको चुनाव चिह्न सूर्यलाई पनि हरियो बनाउने निर्णय बेठीक भएको बताए ।

उनले एमालेले देश बनाउने तर अरु दललाई देश विकासको वास्ता नरहेको बताए । ‘एमाले गाली कम्पिटिशनमा होइन, देश बनाउने काममा लागेको छ,’ ओलीले भने, ‘हुलाकी राजमार्ग बनाउन एमाले चाहियो, पूर्व–पश्चिम राजमार्ग चौडा बनाउन एमाले चाहियो, जनकपुरमा रेलको लिक बनाउन एमाले चाहियो ।’