काठमाडौं - हाल देशभर मनसुनी वायुको प्रभावले काठमाडौँ उपत्यकासहित आसपासका भूभागमा वर्षा भएको छ । जल तथा मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानकै आसपास रहेकाले मौसम सक्रिय बनेको हो ।

महाशाखाले आज दिउँसो देशभरको मौसम सामान्यतया बदली रहने जनाएको छ । दिउँसो गण्डकी, बागमती र सुदूरपश्चिम प्रदेशलगायत देशका पहाडी भू–भागका केही स्थानमा तथा तराई भू–भागका थोरै स्थानमा मेघगर्जन र चट्याङसहित मध्यम वर्षाको सम्भावना छ ।

यसैगरी, बागमती, गण्डकी र लुम्बिनी प्रदेशका पहाडी भू–भागका एक–दुई स्थानमा भारी वर्षाको पनि सम्भावना रहेको महाशाखाले जनाएको छ ।

आज राति पनि देशभर सामान्यतया बदली रही पहाडी भू–भागका केही स्थानहरूमा र तराईका थोरै स्थानहरूमा मेघगर्जन/चट्याङसहित हल्कादेखि मध्यम वर्षाको सम्भावना रहेको छ ।