काठमाडौं - विश्व फुटबल महासंघ (फिफा) ले बिहीबार सार्वजनिक गरेको नयाँ वरीयतामा नेपाली राष्ट्रिय महिला फुटबल टोलीले ऐतिहासिक छलाङ मारेको छ। पछिल्लो वरीयतामा १००औं स्थानमा रहेको नेपाल एकैपटक १३ स्थान माथि उक्लिँदै ८७औं स्थानमा आइपुगेको हो।

१२४८.८९ अंकसहित नेपालले हासिल गरेको यो वरीयता हालसम्मकै कीर्तिमानी तथा उत्कृष्ट हो।

यो वरीयता सुधार हुनुको मुख्य कारण हालै सम्पन्न एएफसी छनोटमा नेपालले गरेको उत्कृष्ट प्रदर्शन हो। उक्त छनोटमा नेपालले लाओसलाई ९-० र श्रीलंकालाई ८-० को फराकिलो अन्तरले पराजित गरेको थियो। समूह चरणको अन्तिम खेलमा शक्तिशाली मानिएको उज्वेकिस्तानसँग निर्धारित समयमा ३-३ को बराबरी खेलेको नेपाल टाइब्रेकरमा भने ४-२ ले पराजित भएको थियो। सोही उत्कृष्ट प्रदर्शनको फलस्वरुप नेपालले वरीयतामा यो ठूलो फड्को मारेको हो।